ഡച്ചുബംഗ്ലാവിലെ പ്രേതരഹസ്യം

“അപസർപ്പകരചന തന്നെ  യുക്തിയാണ് അതിനാൽ ഈ കാര്യത്തിൽ യുക്തിരാഹിത്യം കാണിച്ചു  അപഹാസ്യനാകാതെയിരിക്കുകയാണ് യുക്തി.

                    –  ജി. ആർ  ഇന്ദുഗോപൻ “

കടൽതീരത്തെ ബംഗ്ലാവിൽ ഒരു കൊലപാതകം നടക്കുന്നു. കുറ്റവാളികളെ കിടു കിടാ വിറപ്പിച്ച ഐജി അദേഹമാണ്  സ്വന്തം ബംഗ്ലാവിൽ  കൊല്ലപ്പെടുന്നത് .ഈ സംഭവത്തിനു വർഷങ്ങൾക്ക് ശേഷവും  പ്രദേശവാസികൾ അദേഹത്തിന്റെ  പ്രേതത്തെ രാത്രി കാലങ്ങളിൽ  കാണുന്നു.അതെ സമയം ഡച്ചു ബംഗ്ലാവിൽ താമസത്തിനെത്തുന്ന ഐജി അദേഹത്തിന്റെ മകനും, അമ്മയും ബംഗ്ലാവിൽ വിചിത്രമായ പലതും അനുഭവിച്ചറിയുന്നു. ഈ നിഗൂഢതകളുടെ ചുരുളഴിക്കാൻ നാട്ടുകാരനായ പ്രഭാകരനും,അനന്തനും നടത്തുന്ന ശ്രമങ്ങൾ ആണ്  നോവലിന്റെ ഇതിവൃത്തം. നോവലിന്റെ ആദ്യ പേജുകളിൽ  പറഞ്ഞിരിക്കുന്നത്  പോലെ ഭ്രാന്തമായ ആവേശത്തോടെ മണ്ണിനടിയിൽ  നടക്കുന്ന  തിരച്ചിലുകൾ  ആണ്  നോവലിന്റെ പശ്ചാത്തലം എന്ന് കൂടി സൂചിപ്പിക്കുന്നു.

ഒരു അപസർപ്പക /ഡിറ്റക്റ്റീവ്  കഥയെന്നു  കേൾക്കുമ്പോൾ  പലരുടെയും  മനസ്സിൽ  ഓടിയെത്തുന്നത്  കൈകൾ പുറകിൽ കെട്ടി ഗൗരവഭാവത്തിൽ മുന്നോട്ടു  നടക്കുന്ന, അതുമല്ലെങ്കിൽ  തലയിൽ തൊപ്പിയും വെച്ച് മാന്യമായി  വസ്ത്രം ധരിച്ചു, യൂണിഫോം ഇട്ടു നടക്കുന്ന  ഒരു രൂപമായിരിക്കും. എന്നാൽ ആ മുൻ ധാരണകളെ എല്ലാം പൊളിച്ചു എഴുതിയ  ഒരു രൂപമാണ് ഡച്ചുബംഗ്ലാവിലെ  പ്രേത രഹസ്യത്തിലെ  പ്രഭാകരൻ. കള്ളു മണക്കുന്ന ശരീരവും മുഷിഞ്ഞ ലുങ്കിയും ധരിച്ചൊരു തനി നാട്ടിൻ പുറത്തുകാരൻ.ഈയൊരു സൂചനയാണ്  പ്രഭാകരനെ വിശേഷിപ്പിക്കാൻ ഇവിടെ കുറിക്കുന്നുള്ളു.

അപസർപ്പക കഥകളുടെ വേറിട്ട മുഖമാണ് ജി ആർ ഇന്ദു ഗോപന്റെ  പ്രഭാകരൻ പരമ്പര എന്ന് തുറന്നു പറയട്ടെ. 
ആ പരമ്പരയിലെ  ആദ്യ നോവലാണ്  “ഡച്ചുബംഗാളാവിലെ പ്രേതരഹസ്യം”.വായനക്കാരിൽ സാഹസികതയും, ആകാംഷയും, പിരിമുറുക്കവും നിലനിർത്തി  അവസാനം വരെ  ഒരു  കുറ്റാന്വേഷന നോവൽ ഒരേ ഫ്ലോയിൽ കൊണ്ട് പോവുന്നതു  ചില്ലറ കാര്യമല്ല.ഇന്ദുഗോപന്റെ  രചനകൾക്കും കഥാപാത്രങ്ങൾക്കും  ഒരു പ്രിത്യേക  ഭംഗിയാണ്.ലയിച്ചിരുന്നു  പോവും അതിൽ. പ്രഭാകരൻ സീരിസിലെക്ക്  വരുമ്പോഴും  അതിനു  മാറ്റമൊന്നും  കാണാനില്ല.കഥ നടക്കുന്ന  പ്രകൃതിയും, പരിസരവും  സൂക്ഷ്മ നിരീക്ഷണങ്ങൾക്ക്  വിധേയമാക്കി വായനക്കാരെ  രസിപ്പിക്കുന്ന ഇന്ദുഗോപൻ ഡച്ചുബംഗ്ലാവിലേക്ക്  നമ്മളെ കൂട്ടിക്കൊണ്ടു പോകുമ്പോൾ  ഭീതിയുടെ പരലുകൾ  വാരിയെറിയുന്നുണ്ട്.മിന്നലിന്റെ  ശബ്ദം പോലും മുന്നിൽ  ദൃശ്യമാവുന്ന  പോലെയൊരു തോന്നൽ  വായനയിൽ  അനുഭവപ്പെട്ടേക്കാം.

ഇരുട്ടിൽ കുളിച്ചു നിൽക്കുന്ന ഡച്ചുബംഗ്ലാവിനെ ഇന്ദുഗോപൻ പരിചയപ്പെടുത്തുന്നത്  നോക്കൂ. “പടിഞ്ഞാറു  വലിയൊരു വെളിമ്പ്രദേശം പ്രതിഷ്യപ്പെട്ടു. അതിനു പിന്നാലെ കടലിനു മീതെയുള്ള ആകാശവും ഉയർന്നു വന്നു. അവരുടെ തുടർനടത്തത്തിൽ പശ്ചാത്തലമൊരുക്കിക്കൊണ്ട് ഭീതിയുടെ വലിയൊരു എടുപ്പ് പോലെ ഒരു കോട്ടയും പ്രതിഷ്യപ്പെട്ടു. കരിമ്പാറകൾ കൊണ്ട് മെനഞ്ഞ ശില്പ ഭംഗിയുള്ള ഒരു കൊട്ടാരം. ” എത്ര അനായാസമായിട്ടാണ്  ഇന്ദുഗോപൻ   ബംഗ്ലാവിനെ നോവലിൽ ചിത്രീകരിച്ചു  വെച്ചിരിക്കുന്നത് എന്ന് ഊഹിക്കാവുന്നതേയുള്ളൂ. വായിക്കുമ്പോൾ  തന്നെ  വരികളിൽ  നിന്നും വായനക്കാരന്റെ  മനസ്സിൽ  പതിയുന്ന രൂപം ഭീതിയോ കൗതുകമോ  നിറഞ്ഞതാവും.ഇടിമിന്നലിനെ പ്രേത സന്ദേശത്തോടു ഉപമിക്കുന്ന  വരികൾ  ഇതിനു മറ്റൊരു ഉദാഹരണമാണ്.
കഥാ സന്ദർഭങ്ങൾകനുസരിച്ചും കഥാപാത്രങ്ങൾക്ക്  അനുസരിച്ചും മാറി വരുന്ന ടോൺ നോവലിന്റെ വലിയൊരു പ്ലസ് പോയിന്റാണ്.നിഗൂഢതകളുടെ ചുരുൾ  ഓരോന്നായി  അഴിച്ചു വിടുന്ന  പ്രഭാകരൻ ആദ്യവസാനം  വരെ  വായനക്കാരെ രസിപ്പിച്ചും,ത്രില്ലടിപ്പിച്ചും   വ്യത്യസ്തമായ വായന അനുഭവം  നൽകുന്നു.
ജൂഡ് ആന്റണി ജോസഫ് പ്രഭാകരൻ പരമ്പര സിനിമ ആക്കുന്നതായി അനൗൺസ് ചെയ്തതിനാൽ അധികം വൈകാതെ പ്രഭാകരനെ സ്‌ക്രീനിൽ  കാണാനാവും എന്ന് ഉറപ്പിക്കാം.

അനുബന്ധമായി കൂട്ടിചേർത്തിരിക്കുന്ന കല്ലു മാധവന്റെ കഥയും ഡച്ചുബംഗ്ലാവിലെ പ്രേത രഹസ്യം  എന്ന ബുക്കിൽ നമുക്ക്  വായിക്കാൻ കഴിയും.അതേക്കുറിച്ചു ഒരു വിശിദീകരണം ഇവിടെ നൽകുന്നില്ല. വായിച്ചറിയുന്നതാവും അഭികാമ്യം.

ഡച്ചുബംഗ്ലാവിലെ പ്രേത രഹസ്യം

Author        : ജി ആർ ഇന്ദുഗോപൻ
Genre         :  ഇൻവെസ്റ്റിഗേഷൻ സീരീസ്
Publisher   :  ഡിസി ബുക്സ്
Price           : 95/-

©Geo George

കോഫിഹൗസ്

“ബെഞ്ചമിന്റെ കണ്ണുകളിൽ ഉറക്കം തളം കെട്ടി കിടന്നു. ഉറക്കം പിടിച്ചു വരുമ്പോൾ കൊതുകുകളുടെ ശബ്ദം ചെവിയിൽ. പൂപ്പലിന്റെയും, മലമൂത്ര വിസർജ്യത്തിന്റെയും അറപ്പിക്കുന്ന മണങ്ങൾ തങ്ങി നിൽക്കുന്ന ഭിത്തികളും മൂലകളും. - കോഫിഹൗസ് "

മലയാളത്തിൽ ഒരു സമയത്ത് വൻ പ്രചാരം ഉണ്ടായിരുന്നവയാണ് ത്രില്ലർ ശ്രേണി. പിന്നീട് എപ്പോഴോ അത് അന്യം നിന്നു പോയിരുന്നു. കോഫി ഹൗസിന്റെ വരവ് ത്രില്ലർ വിഭാഗത്തിന് പുത്തൻ ഉണർവു നൽകിയതിന് തെളിവാണ് അടുത്ത കാലത്ത് ഈ വിഭാഗത്തിൽ ഉണ്ടായ മുന്നേറ്റം.അതു തന്നെയാണ് ഈ നോവലിന്റെയും, എഴുത്തുകാരന്റെയും വിജയം.ഇനി നമുക്ക് കോഫിഹൗസിൽ ഒരു കോഫി നുണയാം.

കോട്ടയം നഗരത്തിലെ തിരക്കേറിയ ഒരു കോഫിഹൗസിൽ ഇരുട്ടിന്റെ മറവിൽ നടക്കുന്ന അഞ്ചു കൊലപാതകങ്ങളും അതിനു പിന്നിലെ നിഗൂഢതകളുടെ ചുരുൾ അഴിക്കാൻ എസ്തർ ഇമ്മാനുവേൽ എന്ന യുവ മാദ്ധ്യമ പ്രവർത്തക നടത്തുന്ന ശ്രമങ്ങളും ആണ് കോഫിഹൗസ് എന്ന നോവലിന്റെ ഇതിവൃത്തം. പ്രത്യഷ്യത്തിൽ പുതുമയൊന്നും തോന്നാത്ത ഒരു തീം.അയ്യേ ഇതൊക്കെ നമ്മൾ എത്ര സിനിമയിൽ കണ്ടതാണ് എന്നൊരു തോന്നൽ ഉണ്ടായേക്കും. ആ തോന്നൽ മാറ്റി വെക്കുന്നതാവും നല്ലത്.

കൂട്ടിൽ അടച്ച കിളിയെപ്പോലെ ജയിലഴിക്കുള്ളിൽ ചുരുണ്ടു കൂടിയിരുന്ന ബെഞ്ചമിന്റെ മുഖമാവും കോഫിഹൗസ് വായിക്കുന്ന ഏതൊരു വായനക്കാരിലും ആദ്യം പതിയുന്നത്. ഇമോഷണലി വായനക്കാരനുമായി വളരെ എളുപ്പം ഒരു അടുപ്പം ബെഞ്ചമിനും, അദേഹത്തിന്റെ ബാക്ക്ഗ്രൗണ്ടിനും ഫീൽ ചെയ്യുന്നുണ്ട് എന്നു ഞാൻ വിശ്വസിക്കുന്നു.കട്ടവനെ കണ്ടില്ലെങ്കിൽ കണ്ടവനെ പിടിക്കുന്ന നിയമപാലകർ. അവരുടെ ആരോഗ്യപരമല്ലാത്ത പെരുമാറ്റവും പീഢന മുറകളും നിമിത്തം ബുദ്ധിമുട്ട് അനുഭവിക്കുന്ന തടവുകാർ,മൂന്നാം കിട മാധ്യമ ധർമ്മം കാഴ്ച വെക്കുന്ന മീഡിയകളുടെ ഉൾക്കാഴ്ചകൾ,കുറ്റവാളി ആയാലും അല്ലെങ്കിലും സമൂഹം ഒരാളെ വിലയിരുത്തുന്ന രീതികൾ തുടങ്ങിയവ കോഫിഹൗസിൽ കാണാൻ കഴിയും.

“എസ്തർ ഇമ്മാനുവേൽ”
കോഫിഹൗസ് മർഡർ കേസിൽ ഒരു കോളിളക്കം ഉണ്ടാക്കിയ മാധ്യമ പ്രവർത്തക.ബെഞ്ചമിന്റെ കഥാപാത്രം കഴിഞ്ഞാൽ നോവലിലെ ഒഴിവാക്കാനാവാത്ത ഘടകമാണ് എസ്തറിന്റെത്.എനിക്ക് ആദ്യം നല്ല ദേഷ്യം തോന്നിയ കഥാപാത്രമാണ് ഇത്. മാധ്യമ പ്രവർത്തകയുടെ കൂർമ്മ ബുദ്ധിയും, നിരീക്ഷണവും ഉള്ളവൾ ആയിരുന്നിട്ടും തനിക്കു പിഴച്ചത് എവിടെയാണെന്ന് മനസിലാക്കാനും, തെറ്റു തിരുത്തി മുന്നേറാനും അവൾ സ്വീകരിക്കുന്ന നിലപാടുകൾ ആ കഥാപാത്രത്തോട് ആദ്യം തോന്നിയ വെറുപ്പ് ഇല്ലാതാക്കി. സ്ത്രീ കഥാപാത്രത്തെ മുൻനിർത്തി അവരിലൂടെ പതിഞ്ഞ താളത്തിൽ നോവൽ മുന്നോട്ടു പോകുന്നു. സോമൻ എന്ന ചെറിയ കഥാപാത്രത്തിനു നൽകിയ പരിവേഷം ഗംഭീരമായിരുന്നു എന്ന് പറയാതെ വയ്യ.കോട്ടയവും പരിസരവുമാണ് നോവലിന്റെ പ്രധാന പശ്ചാത്തലം. നഗരത്തിന്റെ മൂക്കും മൂലയും ചുറ്റിയടിച്ചു എസ്തറും, കൂട്ടുകാരിയും സഞ്ചരിക്കുമ്പോൾ ആ പട്ടണവുമായി ഇഴയടുപ്പം സൂക്ഷിക്കുന്ന ഏതൊരാളും വളരെ വേഗം കഥാപരിസരത്തേക്ക് ഇഴുകി ചേരും.

ഊഹിക്കാവുന്ന കഥാഗതിയെന്ന പോരായ്മ നോവലിന് ഉണ്ട്. പക്ഷെ അവതരണശൈലി കൊണ്ടും എസ്തർ ഇമ്മാനുവേലിന്റെ നീക്കങ്ങളിലൂടെയും ആ പോരായ്മകൾ മറികടക്കാൻ നോവലിസ്റ്റിനു കഴിഞ്ഞു .ഇതിൽ ഉപയോഗിച്ച ഭാഷയാണ് എന്നെ അത്ഭുതപ്പെടുത്തിയത്. സാഹിത്യത്തിന്റെ നീളൻ വർണ്ണനകളോ, ഏച്ചു കെട്ടലോ ഇല്ലാത്ത ലളിത ഭാഷ.വായനയിൽ നിന്നും അകന്നു നിൽക്കുന്നവർക്ക് വീണ്ടും വായന ആരംഭിക്കാൻ കോഫിഹൗസ് പോലെയുള്ള നോവലുകൾ ഒരുപാട് സഹായകമാവും.

കോഫി ഹൗസ്

Author : ലാജോ ജോസ്
Genre : ഇൻവെസ്റ്റിഗേഷൻ ത്രില്ലർ
Publisher : ഗ്രീൻ ബുക്സ്
Price : 285/-

© Geo George

വിലായത്ത് ബുദ്ധ

“ചന്ദനത്തീ രക്തവർണ്ണം  പൂശിയാ രക്തചന്ദനമാകും. തൂത്തുകുടിന്ന് പതിനൊന്നു ഭഗവാന്മാരാകാൻ  അവിടുന്ന് കപ്പലു കയറും. ഷാങ്ഹായിയിൽ ലോകത്തിലെ  ഏറ്റവും  പെർഫെക്‌ടായ  പതിനൊന്നു  ബുദ്ധന്മാർ ജനിക്കും.ചിലപ്പോൾ അവിടുന്ന്  ഇരട്ടിവിലക്ക് ടോക്കിയോയിൽ എത്താനും സാധ്യതയുണ്ട്.എവിടാണെലും അവിടുന്ന് ലോകത്തിനു  പ്രകാശമായി ജീവിക്കും. അങ്ങേക്ക്  നമസ്കാരം.യാത്രാമംഗളം. “
                                 – ഡബിൾ മോഹനൻ

കാറ്റിൽ  ഒഴുകിയെത്തുന്ന മറയൂർ  ശർക്കരപ്പാവിന്റെയും  , ചന്ദനത്തടിയുടെയും   ഗന്ധം. ഒരു  ലഹരി  പോലെ വായനക്കാരിലേക്ക്  ആ  ഗന്ധം ഒഴുകിപടരുന്ന അവതരണരീതി.  ജി. ആർ  ഇന്ദുഗോപന്റെ  വിലായത്ത് ബുദ്ധയെന്ന നോവലിനെ  ചുരുങ്ങിയ  വാചകങ്ങളിൽ ഇങ്ങനെ  വിശേഷിപ്പിക്കാനാണ്  തോന്നുന്നത്.

ചന്ദന കൊള്ളക്കാർ  വിലായത്ത് ബുദ്ധയെന്ന്  ഓമനപ്പേരിട്ട്  വിളിക്കുന്ന ചന്ദന  മരം ചില  കാരണങ്ങളാൽ  സ്വന്തം  വീട്ടുമുറ്റത്ത് വളർത്തുന്ന ഭാസ്കരൻ മാഷ്. മാഷിനെ  വെല്ലു വിളിച്ചു  ആ  മരം  മുറിച്ചു കടത്താൻ ഒരുങ്ങുന്ന ഡബിൾ  മോഹനൻ. അവരുടെ  വീറും വാശിയും നിറഞ്ഞ പോരാട്ടമാണ്  നോവലിന്റെ ഇതിവൃത്തം.

നോവലിന്റെ  ഇതിവൃത്തത്തോട്  ചേർന്നു  നിൽക്കുന്ന പാത്ര സൃഷ്ടികൾ. ഭാസ്കരൻ മാഷിന്റെ  മകനായ  അനി.ചെമ്പകം മകൾ ചൈതന്യം. തുന്നൽക്കാരനിൽ  നിന്നും  പഞ്ചായത്ത്‌  പ്രസിഡന്റിലേക്ക്  പരിണാമം  ചെയ്യപ്പെടുന്ന   ഉതുപ്പാൻ. പാർട്ടി നേതാവായ പീറ്റർ എന്നിങ്ങനെ  നീളുന്നു  ആ ലിസ്റ്റ്.

കണ്ടും കേട്ടും തഴമ്പിച്ച  പ്രതികാര കഥകളിൽ  നിന്നും  വ്യത്യസ്തമായൊരു   ശൈലിയിലേക്ക്   വായനക്കാരനെ  കൈ പിടിച്ചു  നടത്തുകയാണ്  ജി. ആർ  ഇന്ദുഗോപൻ. സിനിമാറ്റിക്ക് എക്സ്പീരിയൻസ്  തരുന്ന അദേഹത്തിന്റെ  അവതരണ ശൈലിയോട് കിട പിടിക്കാൻ  കഴിയുന്ന  എഴുത്തുകളൊന്നും  സമീപകാലത്ത്  വായിക്കാൻ കഴിഞ്ഞിട്ടില്ല.കഥാപാത്രങ്ങളും , കഥ നടക്കുന്ന  അന്തരീക്ഷവും, അതിനോട്   ചുറ്റിപ്പിണഞ്ഞു  കിടക്കുന്ന    നിഗൂഢതകളും, ആന്തരിക അർഥങ്ങളും ഉൾച്ചേർന്ന  അദേഹത്തിന്റെ  ശൈലി  ഇപ്പോഴും സമകാലിക എഴുത്തുകാരിലും, വായനക്കാരിലും  അത്ഭുതമാണ്.

ഇനി  നമുക്ക്  വിലായത്ത്  ബുദ്ധയിലേക്ക്  കടന്നു  വരാം.  മറയൂരിന്റെ  ഭൂപ്രകൃതിയിലൂടെ  കഥാപാത്രങ്ങളുടെ  പേരിലൂടെ, സംഭാക്ഷണങ്ങളിലൂടെ  ഒറ്റ പോക്കാണ് നോവൽ  തുടങ്ങി   അവസാനിക്കുന്നത്  വരെ.അവിടെ  ഒരു  ബെല്ലോ,ബ്രേക്കോ  ഒന്നുമില്ല.മറയൂരിലെ  ഒരു ഇരുണ്ട സായാഹ്നത്തിൽ ദേഹിയിൽ പുരണ്ട കറുത്ത പാട്  മായാതെ  ഭാസ്കരൻ മാഷും,കൊല്ലങ്ങൾക്ക്  മുൻപേ  മോഹനന്റെ  പുരികക്കൊടിയിൽ  വീണ  പാടും അനുവാചകരിൽ  അതിവേഗമാണ്  ഇടം പിടിക്കുന്നത്.സ്വന്തം പ്രണയിനിയെ  ദേവതയെപ്പോലെ  ചേർത്ത് പിടിക്കുന്ന മോഹനൻ ഒരു സാധാരണക്കാരൻ അല്ലെന്നു അടിവരയിടുന്നു. ലക്ഷ്യബോധമുള്ള  ഒരു മനുഷ്യനെയും  നമുക്ക് മോഹനനിൽ  കാണാൻ  കഴിയും.നാണക്കേടിന്റെ  പർവത്തിൽ  സ്വന്തം വിസർജനത്തിൽ  കുളിച്ചു  കിടക്കുന്ന  ഭാസ്കരൻ  മാഷിനെ  ഒരു കുഞ്ഞു കുട്ടിയെപ്പോലെ  വാരി എടുത്തു  വൃത്തിയാക്കുന്ന  മോഹനനിൽ   എവിടെയൊക്കെ  ബുദ്ധന്റെ  ഒരു സാദർശ്യം ദർശിക്കാൻ  കഴിയുന്നുണ്ട്. ഹിംസയുടെ വഴിയേ പോകാതെ അഹിംസയുടെ പാത വെട്ടിത്തുറക്കുന്ന മോഹനൻ നോവൽ അവസാനിക്കുമ്പോൾ തീർച്ചയായും മനസ്സിൽ ഇടം പിടിക്കും.

ഈ നോവലിന്റെ പ്രിത്യേകതയെന്താണെന്ന് ചോദിച്ചാൽ തല പുകച്ചു ബുദ്ധി ജീവി ചമയാതെ ആർക്കും  വായിക്കാവുന്നതും  മനസ്സിലാക്കാവുന്നതുമായ ലളിതമായ അവതരണമെന്നൊരു അഭിപ്രായം എനിക്കുണ്ട് . ഒറ്റ നോട്ടത്തിൽ അപൂർണമെന്നു തോന്നാമെങ്കിലും  വരികൾക്കിടയിൽ വെറുതെ  ഒന്നോടിച്ചു വായിച്ചാൽ  ഇന്ദുഗോപന്റെ   ക്രാഫ്റ്റ്  തെളിഞ്ഞു  നിൽക്കുന്ന  നോവലാണ്  വിലായത്ത്  ബുദ്ധ. ഒരുപക്ഷെ  മണ്ണിൽ  വേരുകൾ  ആഴത്തി മറ്റു മരങ്ങളുടെ  വെള്ളവും, വളവും  ഊറ്റിക്കുടിച്ച്‌ പടർന്ന്  പന്തലിക്കുന്ന  ചന്ദനമരത്തെപ്പോലെ  വിലായത്ത്  ബുദ്ധയും ഇന്നല്ലെങ്കിൽ  നാളെ  വായനക്കാരിൽ  പടർന്ന് പന്തലിക്കും എന്നനുമാനിക്കാം.

വിലായത്ത് ബുദ്ധ

Author      :  ജി. ആർ  ഇന്ദുഗോപൻ
Genre       :  നോവൽ (ഫിക്ഷൻ )
Publisher :  മാത്രഭൂമി  ബുക്സ്
Price        :   180/-

© Geo George

നാരങ്ങാമുട്ടായി

നാരങ്ങാമുട്ടായി 

പെട്ടിക്കടയിലെ വലിയ ചില്ലുഭരണിയിൽ മഞ്ഞ നിറത്തിൽ നിറച്ചു വെച്ചിരിക്കുന്ന നാരങ്ങാമുട്ടായി  നോക്കിയപ്പോൾ കേശുവിന്റെ  വായിൽ വെള്ളം നിറഞ്ഞു. അവന്റെ  ഇടതു കരം  പോക്കറ്റിലേക്ക് ആഴ്ന്നിറങ്ങി. 50 പൈസയുടെ ഒരു നാണയമാണ് അവന്റെ  വിരലുകളിൽ തടഞ്ഞത്. അതെടുത്ത്  ഉള്ളംകയ്യിൽ ഭദ്രമായി മുറുകെ പിടിച്ചു  കേശു കടക്കാരന്റെ അടുത്ത് ചെന്നു.   

“ഉം എന്തു വേണം …?”

കടയുടമ കുട്ടൻപിളള അവന്റെ  മുഷിഞ്ഞ വസ്ത്രങ്ങളിലേക്കും നിറംമങ്ങിയ  പഴയ  സഞ്ചിയിലേക്കും കണ്ണോടിച്ചു   അവജ്ഞയോടെ  ശബ്ദമുയർത്തി.

“നാരങ്ങാമുട്ടായി ..”

ഉള്ളം കയ്യിൽ മുറുകെ പിടിച്ചിരുന്ന  നാണയം അയാൾക്ക്‌ നേരെ  നീട്ടിക്കോണ്ടവൻ മന്ത്രിച്ചു.തന്റെ കയ്യിൽ വീണ  നാണയത്തിലേക്ക്  നോക്കിയ കുട്ടൻപിള്ളയുടെ  മുഖം  ചുളിഞ്ഞു.അതെ നിമിഷം നാണയം ആ  

പിഞ്ചു ബാലന്റെ  മുഖത്തേക്ക്    വലിച്ചെറിഞ്ഞ്   അയാൾ ഒരു കാളയേപ്പോലെ മുക്രയിട്ടു.

“കടന്നു പോ അശ്രീകരമേ….നിന്നെപ്പോലത്തെ തെണ്ടിക്കുട്ടിയോൾക്ക് വേണ്ടിയല്ല്യ  ഞാനിവിടെ  മിഠായി വെച്ചിരിക്കണേ..”

അപ്രതീഷിതമായ ആ  പ്രതികരണത്തിൽ പകച്ചു  പോയ  കേശു തന്റെ 

ദേഹത്തു തട്ടി  പൂഴി മണ്ണിൽ  വീണ നാണയം  കുനിഞ്ഞെടുത്ത് അതിലെ പൊടി തട്ടിക്കളഞ്ഞ് നിറയുന്ന മിഴികൾ കൈ കൊണ്ട് തുടച്ചു.ഒരു അനാഥ ബാലന് സഹിക്കാനാവുന്നതിലും അപ്പുറമായിരുന്നു ആ അപമാനം. അന്നേ ദിവസം  കോൺവെന്റിൽ നിന്നും വഴിച്ചിലവിന് തന്ന  അഞ്ചു രൂപയിൽ  മറ്റൊരു കടയിൽ നിന്നും  പെൻസിൽ വാങ്ങിയ ഇനത്തിൽ    ബാക്കിയുണ്ടായിരുന്ന പണമായിരുന്നു ആ അൻപത്  പൈസ. അവനത് ഒരു നിധി പോലെ  തന്റെ  പോക്കറ്റിലേക്ക് ചേർത്തു വെച്ചതാണ്  പെട്ടിക്കടയിലെ  ചില്ലു ഭരണിയിൽ നിറച്ചിരിക്കുന്ന നാരങ്ങാമുട്ടായി സ്വന്തമാക്കാൻ.തുളുമ്പിയ മിഴിക്കോണുകളിലൂടെ തിരിഞ്ഞു നോക്കിയപ്പോൾ ചില്ലുഭരണിയിലെ നാരങ്ങാമുട്ടായികൾ തന്നെ നോക്കി ആർത്തു ചിരിക്കുന്നതായി അവനു തോന്നി. 

സ്കൂൾ വളപ്പിലെ മുത്തശ്ശിമാവിന്റെ ചോട്ടിൽ വീണു കിടന്ന  പച്ച മാങ്ങകളിൽ  ഒന്നെടുത്ത്  പോക്കറ്റിൽ വെച്ച്  അവൻ  തന്റെ ക്ലാസ്സ്‌ ലക്ഷ്യമാക്കി നടന്നു. ക്ലോക്കിലെ സൂചികൾ ചലിച്ചു കൊണ്ടിരുന്നു.ഓരോ അദ്ധ്യാപകരായി ക്ലാസ്സ്‌ റൂമിൽ വന്നു പോയിക്കൊണ്ടിരുന്നത്  അവനറിഞ്ഞില്ല.ക്ലാസ്സ്‌ മുറിയിൽ ഏറ്റവും പിന്നിലെ ബെഞ്ചിൽ  ഒട്ടിയ വയറും നിറഞ്ഞ കണ്ണുകളുമായി ക്ലാസ്സിൽ ഇരിക്കുന്ന അവനെയാരും മറ്റു ബഹളങ്ങൾക്കിടയിൽ  ശ്രദ്ധിച്ചതുമില്ല.

സ്കൂളിൽ  ഉച്ചക്കഞ്ഞിക്കുള്ള ബെല്ലടിച്ചപ്പോൾ കുട്ടികൾ തിക്കും,തിരക്കുമുണ്ടാക്കി കഞ്ഞിപ്പുരക്ക് സമീപത്തേക്ക് ഓടി. കേശുവാകട്ടെ അവരിൽ നിന്നെല്ലാം ഒഴിഞ്ഞു മാറി മെല്ലെ  ആ  നീളൻ  ക്യുവിന്റെ  പിന്നിലിടം പിടിച്ചു. 

തിരക്കുകൾ ഒഴിഞ്ഞപ്പോൾ തനിക്കു കിട്ടിയ  കഞ്ഞിയുമായി  മുത്തശ്ശിമാവിന്റെ  ചുവട്ടിലെ  ആളൊഴിഞ്ഞ  ഒരു മൂലയിൽ  അവൻ ഇരിപ്പുറപ്പിച്ചു. സ്കൂളിലെ ഉച്ചയൂണിന്റെ  സമയത്തുള്ള  നിതൃ സന്ദർശകരായ പൂച്ചകൾക്കൊപ്പം ഇരുന്ന് ഭക്ഷണം  പങ്കിട്ടു കഴിക്കുന്ന കേശുവിനെ അപ്പോഴാണ്  ഉച്ചയൂണ് കഴിഞ്ഞു കുട്ടികളെ നിരീക്ഷിക്കനിറങ്ങിയ ശാരദ ടീച്ചർ  ശ്രദ്ധിച്ചത്. ദിവസങ്ങൾക്ക് മുൻപ് പുതിയതായി മലയാളം വിഭാഗത്തിൽ  എത്തിയതായതിനാൽ  അവർ  കൗതുകത്തോടെ  കേശുവിനെ നിരീക്ഷിച്ചു. 

അല്പസമയത്തിനു ശേഷം നിരീക്ഷണം  മതിയാക്കി  

സ്റ്റാഫ് റൂമിലേക്ക്‌  തിരിച്ചു നടക്കുമ്പോൾ  ശാരദ  ടീച്ചർ എന്തൊക്കെയോ മനസ്സിൽ  ഉറപ്പിച്ചിരുന്നു. സ്റ്റാഫ്‌ റൂമിലെത്തിയതും  ഒന്നാം ക്ലാസ്സിന്റെ  ചുമതലയുള്ള അനിത ടീച്ചറിന്  സമീപത്തേക്ക് ശാരദ  ടീച്ചർ  നടന്നു. അല്പം നേരത്തെ  കുശലം പറച്ചിലിന് ശേഷം  ശാരദ ടീച്ചർ  മെല്ലെ ചോദിച്ചു. 

“ടീച്ചറേ ഒന്നാം  ക്ലാസിലെ ഒരു കുട്ടിയുണ്ടല്ലോ സ്ഥിരമായി ഒറ്റക്ക് നടക്കുന്നതും പൂച്ചക്കുട്ടികൾക്കൊപ്പം ഇരുന്ന് ഭക്ഷണം കഴിക്കുന്നതും എന്താ അവന്റെ  പേര്..?”

മുൻപിൽ തുറന്നു വച്ചിരുന്ന തടിയൻ  ബുക്കിലേക്ക്  ഒന്നു നോക്കി.ശേഷം  ചുണ്ടിലൊരു പുച്ഛച്ചിരിയോടെ  മൊഴിഞ്ഞു 

“ടീച്ചർ പുതിയതായി വന്നതല്ലേ അതുകൊണ്ട് പറഞ്ഞേക്കാം… അധികം  അടുപ്പത്തിനൊന്നും പോയേക്കല്ലേ..”

“അതെന്താ..? “

ആകാംഷയോടെ  ശാരദ  ആരാഞ്ഞു. 

 “അവനൊരു തൊണ്ടിക്കുട്ടിയാ.. അവന്റെ തന്തയും, തള്ളയും AIDS  വന്നാണ് മരിച്ചത്.. !” അനിത എടുത്തടിച്ചു പറഞ്ഞപ്പോൾ  ശാരദയുടെ  മിഴികളിൽ ഒരു പകപ്പുണ്ടായി.അത്  ശ്രദ്ധിക്കാതെ അനിത  തുടർന്നു 

“ഇപ്പോൾ ഏതോ കോൺവെന്റിൽ നിന്നാണ് അവന്റെ  പഠനമൊക്കെ.. “

“ഏതു  കോൺവെന്റ് ആണെന്ന് അറിവുണ്ടോ  ടീച്ചർക്ക്..? “ശാരദ തന്റെ  കണ്ണട നേരെ  വെച്ചു ആരാഞ്ഞു. അനിതയാവട്ടെ  അലസ ഭാവത്തിലാണ്  അതിനു മറുപടി നൽകിയത്. 

“ആ …  ഇവടെ അടുത്തുള്ള എസ്. എസ് കോൺവെന്റാണ്.. “

അതു  പറഞ്ഞു കഴിഞ്ഞതും  ശബ്ദം  താഴ്ത്തി അവർ  പിറുപിറുത്തു 

“നാട്ടാര് പറഞ്ഞു കേക്കുന്നുണ്ട് അവനും HIV  പോസ്റ്റിവ്  ആണെന്ന്.. അത് സത്യാണോന്നറിയില്ല… “

ശാരദ ടീച്ചറൊന്നു  മൂളി.അത്  ശ്രദ്ധിക്കാതെ  അനിത ബാക്കിയും പറഞ്ഞു 

“എന്നാലും  അവനിങ്ങോട്ട്  വരുന്നത് പഠിക്കാനാണോ,  അതോ അവന്റെ  ചത്തു മലച്ച തന്തയുടെയും,തള്ളയുടെയും കയ്യീന്ന് കിട്ടിയ അസുഖം ഇവിടൊള്ളോർക്കും പടർത്താനാണോ ആവോ..? “

അതിന് മറുപടിയൊന്നും പറയാതെ ശാരദ ടീച്ചർ കസേരയിൽ എന്തോ ആലോചനയിൽ  മുഴുകിയിരുന്നു.ദിവസങ്ങൾ കൊഴിഞ്ഞു വീണു കൊണ്ടിരുന്നു.

ഒരു ദിവസം ബസ്സിറങ്ങി സ്കൂളിലേക്ക് നടന്നു വരുമ്പോൾ ടീച്ചർ ഒരു കാഴ്ച കണ്ടു.

സ്കൂളിനു സമീപത്തുള്ള  പെട്ടിക്കടയിലെ മുട്ടായി  ഭരണിയിലേക്ക് നോക്കി വായിൽ വിരൽ വെച്ച് നുണയുന്ന കേശുവിനെ.

കുറച്ചു ദിവസങ്ങൾ കൂടി കടന്നു പോയി കേശു പഠിക്കുന്ന ക്ലാസിൽ ഒരു ബഹളം കേട്ടാണ് ശാരദ ടീച്ചർ ഇന്റർവെൽ  സമയത്ത് അങ്ങോട്ടു ചെന്നത്.

അവിടെ മറ്റു കുട്ടികളുടെ നടുവിൽ അപമാനിതനായ മുഖത്തോടെ കേശു നിൽപ്പുണ്ടായിരുന്നു.

“എന്താ പ്രശ്നം..?”

ടീച്ചർ ചോദിച്ചു.

“അവൻ ഞങ്ങളുടെ നാരങ്ങാമുട്ടായി  കട്ടു ടീച്ചറേ..

കളളൻ..”

ക്ലാസ്സിലെ നേതാവായ തക്കുടു വിളിച്ചു പറഞ്ഞത് കേട്ട് മറ്റു കുട്ടികൾ ഉറക്കെ ചിരിച്ചു.ചിരിയും ആരവവും  കൂടിയപ്പോൾ  ശാരദ  ടീച്ചർ  ഉറക്കെ  പറഞ്ഞു  

“സൈലൻസ്… !”

കുട്ടികൾ നിശ്ശബ്ദരായി. ടീച്ചർ  പതിയെ  കേശുവിന്റെ അടുത്തേക്ക് ചെന്നു  ചോദിച്ചു 

“നീ മോഷ്ടിച്ചോ അവരുടെ നാരങ്ങാമുട്ടായി..?”

കേശുവിന്റെ മുഖം അപമാനഭാരത്താൽ  കുനിഞ്ഞു.എങ്കിലും  അവൻ  ഏങ്ങലടിച്ചു കൊണ്ട്  പറഞ്ഞു 

“ഉം..എനിക്ക് കൊതി അടക്കാൻ കഴിയാഞ്ഞിട്ടാ ടീച്ചറേ…എനിക്കാരും തന്നില്ല്യാ.”

ഒരു നിമിഷത്തെ മൗനത്തിനു ശേഷം  

ടീച്ചർ അവന്റെ  നേരെ കൈ നീട്ടി 

“കേശു അതിങ്ങ് തരൂ…”

മടിച്ചു മടിച്ചു കേശു  പോക്കറ്റിൽ ഇട്ടിരുന്ന നാരങ്ങാമുട്ടായി  ടീച്ചർക്ക് നീട്ടി. അപ്പോളും അതിലെ നാരാങ്ങാമുട്ടായികൾ  തന്നെ നോക്കി പരിഹസിക്കുന്നതായി അവനു തോന്നി.ആ മിഠായിപ്പൊതി തക്കുടുവിന് നൽകിയ ശേഷം ശാരദ ടീച്ചർ കേശുവിന്റെ  കൈകളിൽ പിടിച്ച് സ്റ്റാഫ് റൂമിലേക്ക് നടന്നു. ഇന്റർവെൽ  സമയം കഴിഞ്ഞിരുന്നതിനാൽ മറ്റു ടീച്ചേർസ് അവരവരുടെ ക്ലാസുകളിലേക്ക് പോയിരുന്നു.അവനെ അരികെ വിളിച്ച ശേഷം ശാരദ ടീച്ചർ പറഞ്ഞു.

“കൈ നീട്ടു കുട്ട്യേ…”

ശാരദ ടീച്ചറുടെ 

ചൂരൽ വടി കൊണ്ടുളള അടിയുടെ വേദനയോർത്ത് കണ്ണുകൾ ഇറുകെ പൂട്ടി കേശു തന്റെ  വലത്തേ കൈ നീട്ടി പിടിച്ചു.നീട്ടിപ്പിടിച്ച ആ പിഞ്ചു കരങ്ങളിലേക്ക് മേശ വലിപ്പിലിരുന്ന ചെറിയ പൊതി ശാരദ ടീച്ചർ വെച്ചുകൊടുത്തു.കുഞ്ഞു കരങ്ങളിൽ  ഭാരം അനുഭവപ്പെട്ടപ്പോൾ കേശു മിഴി  തുറന്നു.അവന്റെ  കണ്ണുകളിൽ ഭയം  നിഴലിച്ചിരുന്നു. പൊതി തുറന്നു നോക്കാൻ ശാരദ ടീച്ചർ ആഗൃം കാണിച്ചു.

പൊതി തുറന്ന അവന്റെ  കുഞ്ഞു നേത്രങ്ങൾ അത്ഭുതം കൊണ്ട് വിടർന്നു ആ പൊതി നിറയെ നാരങ്ങാമുട്ടായി.ആശ്ചര്യവും,കൗതുകവും  അവന്റെ  മുഖത്ത്  നിറഞ്ഞു. അവന്റെ  നിറുകയിൽ തലോടിക്കൊണ്ട് മുട്ടായി 

കഴിച്ചു കൊളളാൻ ടീച്ചർ ആഗൃം കാണിച്ചു.ഒപ്പം  അവന്റെ  കാതുകളിൽ  മന്ത്രിച്ചു 

” ഇനി മോഷ്ടിക്കരുത് മോന് വേണ്ടതെല്ലാം ടീച്ചർ വാങ്ങിത്തരും..!”.

 വിശ്വാസം വരാതെ കേശു തന്റെ  കുഞ്ഞു നയനങ്ങളുയർത്തി ടീച്ചറെയും,മുട്ടായിപ്പൊതിയെയും നോക്കിയതും  ടീച്ചർ  അവന്റെ  നിറുകയിൽ ഒരു ചുംബനം നൽകി. എന്നിട്ട്  പോയിക്കോളാൻ കണ്ണ് കൊണ്ട് അനുവാദം നൽകി.മനസ്സിൽ തിരതല്ലുന്ന സന്തോഷത്തോടും, അതിലേറെ ആർത്തിയോടെയും നാരങ്ങാമുട്ടായി വായിലിട്ട് നുണഞ്ഞു കൊണ്ട്  കേശു മുത്തശ്ശിമാവിന്റെ ചുവട്ടിലേക്കോടി.

കേശുവിന്റെ ആ  നടത്തം വാസല്യത്തോടെ  നോക്കി നിന്ന ശാരദ ടീച്ചറിന്റെ പേഴ്സിൽ   ഒരു നിറം മങ്ങിയ ചിത്രമുണ്ടായിരുന്നു.ഏകദേശം  കേശുവിന്റെ  പ്രായമുള്ള, നാരങ്ങാമുട്ടായി നുണയുന്ന ഒരു മിടുക്കനായിരുന്നു അത്.അതിനു താഴെ ചെറിയ അക്ഷരങ്ങളിൽ  ഇപ്രകാരം എഴുതിയിട്ടിരുന്നു. 

 “അപ്പുണ്ണി  കൂടെയുണ്ട്  ഇപ്പോഴും.. “

അതു ടീച്ചറിന്റെ മരണപ്പെട്ടു പോയ മകന്റെ വരികളായിരുന്നു.

©Geo George

First Published 19/05/2018. Reedited 17/08/2020

അഘോരികളുടെ ഇടയിൽ

“ഓരോ ജീവനും ഈ ഭൂമിയിൽ അവതാരമെടുക്കുന്നത്  ഒരു നിയോഗവുമായാണ്. എന്നാൽ ജനിച്ച വേളയിൽ മഹത്തരമായ ആ രഹസ്യത്തെ ജീവനിൽ നിന്ന് മറച്ചു വെക്കുന്നു. ആ നിയോഗത്തെ സഹായിക്കാനുള്ള വ്യക്തികളും ആ ജീവനൊപ്പം തന്നെ ഭൂമിയിലേക്ക് വരുന്നുണ്ട്. മായയുടെ  കുരുക്കിൽപ്പെട്ടു നാം അതറിയുന്നില്ല എന്ന് മാത്രം.”

ആരോടും  യാത്ര ചോദിക്കാൻ നിൽക്കാതെ  കോഴിക്കോട്  നിന്നും വാരണാസിയിലേക്ക്   കഥാനായകന്റെ  ബുള്ളറ്റിലേറിയൊരു  യാത്ര.സ്വന്തമെന്നു  കരുതുന്നതൊക്കെ  ഉപേക്ഷിച്ചു  അഘോരിയാവാൻ  ഇറങ്ങിപ്പുറപ്പെടുന്ന ഒരു  ചെറുപ്പക്കാരന്റെ കഥയാണ്  “അഘോരികളുടെ  ഇടയിൽ ”  എന്ന നോവലിന്റെ  ഇതിവൃത്തം. തൊണ്ണൂറ്റി അഞ്ചു പേജുകളിലായി അദ്ദേഹം പിന്നിട്ട വഴികളും,നേരിട്ട  ദുരന്തങ്ങളും,  പരിചിതരായി മാറിയ അപരിചിതരുമെല്ലാം കടന്നു വരുന്ന നോവൽ  ഒരു ഫിഷൻ  ആണെന്ന്  അറിയുമ്പോഴാണ്  അതിലും  അത്ഭുതം  തോന്നുക.

പ്രണയിനിയായ  തനുവിനോടുള്ള  കഥാനായകന്റെ  പ്രണയവും, വിരഹവും  പങ്കു വെച്ച്,ഭാരതസംസ്കാരങ്ങൾ കൂട്ടിയിണക്കി, ചരിത്രത്തെ  ഒരു മുത്തുമാലയിൽ കോർത്തത് പോലെയുള്ള  അവതരണ ശൈലിയാണ്  അഘോരിയിൽ  കാണാൻ  കഴിയുന്നത്. ഉജ്ഞയനി നഗരത്തിന്റെ  ഉള്ളറകളിലൂടെ നടന്നു നീങ്ങുന്ന   അദ്ദേഹം  ബോഗപുരയിലെ  ഗലികളിലൊന്നിൽ  നിന്നും കണ്ടെത്തിയ  രുദ്രയെയും  പ്രണയത്തെക്കുറിച്ചുള്ള  അവളുടെ  കാഴ്ചപ്പാടുകളെയും   ആഴത്തിൽ  അവതരിപ്പിക്കുന്നു. കാമപൂർത്തികരണത്തിനായി  തനിക്കു  മുന്നിലെത്തുന്ന  മറ്റു  പുരുഷന്മാരിൽ  നിന്നും  വ്യത്യസ്തനായ  ഒരുവന്  മുന്നിൽ   രുദ്രയുടെ  മനസ്സ്  തുറക്കപ്പെടുമ്പോൾ കഥാനായകന്റെ  അതെ  ആകാംഷ അനുവാചകരിലും  ഉണരും. പ്രണയം ആത്മാവിന്റെ  പൂർണ്ണതയറിയുവാനുള്ള അന്വേഷണണമായി  വർത്തിക്കുമ്പോൾ കാമത്തെ ശരീരത്തിന്റെ  പൂർണ്ണതക്കായുള്ള അന്വേഷണമായി എഴുത്തുകാരൻ  ചൂണ്ടിക്കാണിക്കുന്നു.ശില്പനഗരമായ ഖജുരാഹോയും,ആഗ്രയിലെ  വെണ്ണക്കൽ കുടീരവുമെല്ലാം  നോവലിൽ  കടന്നു  വരുന്നുണ്ട്. ഖജുരാഹോയെക്കുറിച്ചുള്ള സൂചനകൾ  വായിക്കുമ്പോൾ
അവിടെ നിർമ്മിക്കപ്പെട്ട ചരിത്ര നിർമ്മിതികളും, കപടസദാചാരവാദികളുമെല്ലാം എഴുത്തിനു  വിഷയമായി  മാറുന്നത്  പുനർവായനകൾക്കും  ചർച്ചകൾക്കും  വഴിയൊരുക്കിയെക്കാം എന്നൊരു  തോന്നൽ  വായനക്കാരിൽ  ഉണ്ടായേക്കാം.
കഥാപാത്രങ്ങളുടെ  സൃഷ്ടിയിൽ  രചിയിതാവ്  പുലർത്തിയ  ജാഗ്രത  വളരെ  മികച്ചതായി.വന്ന്  പോകുന്ന  ഓരോ  കഥാപാത്രങ്ങളും  അനുവാചകരിൽ  ഇടം  പിടിക്കും . ദിഷനും, ദ്രുപതിനുമിടയിൽ   എവിടെയൊക്കെയോ  എനിക്ക്  ചുറ്റിലുമുള്ള ആരെയൊക്കെയോ ഇടക്ക്  ഓർമിപ്പിച്ചു.അതായത് ലക്ഷ്യ പൂർത്തികരണത്തിനായുള്ള  യാത്രയിൽ  നമുക്കു ചുറ്റിലും  വന്ന്  പോകുന്ന  ഓരോരുത്തരും  നാമറിയാതെ നമ്മോടു  ചേർന്ന്  നിൽക്കുന്നുവെന്ന  ഓർമ്മപ്പെടുത്തൽ  കൂടിയാണ്  ഈ  നോവൽ.

അഘോരികളെക്കുറിച്ചുള്ള  തെറ്റായ  ധാരണകളെ പൊളിച്ചെഴുതിയ വിവരണം നോവലിന്റെ  വലിയൊരു  പോസ്റ്റീവാണ്. അച്ചടിയിൽ  കടന്നു കൂടിയ ചില്ലറ  വ്യാകരണതെറ്റുകൾ     ഒഴിവാക്കിയാൽ  ട്രാവൽ  ഫിക്ഷൻ  വിഭാഗത്തിൽ  അടുത്തിടെ  മലയാളത്തിൽ  വായിച്ച നല്ല  നോവലാണ്  “അഘോരികളുടെ  ഇടയിൽ”.വായന  പൂർണ്ണമായപ്പോൾ  നേരിട്ട്  പോവാതെ  ഓരോ  സ്ഥലങ്ങളും, സംസ്കാരവും വിശദമായി പഠിച്ച്  അതിനെയൊക്കെ  മനോഹരമായി  വിവരിച്ച   എഴുത്തുകാരന്റെ   കഴിവിനെയും, ഹാർഡ് വർക്കിനെയും  ഓർത്ത്  അഭിമാനം  തോന്നി. റിഹാൻ താങ്കൾ ഒരു വിലയേറിയ മുതലാണ്  സാഹിത്യ രംഗത്ത്.

അഘോരികളുടെ ഇടയിൽ

Author        :  റിഹാൻ റഷീദ്
Genre         :  ട്രാവൽ  ഫിക്ഷൻ
Publisher   :  സൂചിക ബുക്സ്
Price          :  120/-

© Geo George

ഒറ്റക്കാലുള്ള പ്രേതം


“ഒടുവിൽ എനിക്ക് ബോദ്ധ്യമായിരിക്കുന്നു.പ്രേതമുണ്ട്. അവയെ ഹൃദയം കൊണ്ടു മാത്രമേ കീഴടക്കാനാവൂ, ഒളിച്ചു നിന്നും വിരട്ടിയും അവയുടെ സാന്നിദ്ധ്യം അനുഭവിക്കാനാവില്ല.

                                -ഒറ്റക്കാലുള്ള പ്രേതം “

ഗോഥിക് ഫിക്ഷൻ  വിഭാഗത്തിൽ  ഉൾപ്പെടുന്ന  ഒറ്റക്കാലുള്ള പ്രേതം ഭീതിയും,കൗതുകവും,അതിലുപരി  ആകാംഷയും നിറച്ചു
മനുഷ്യ  മനസ്സിന്റെ ഉള്ളറകളിൽ  വേരുകളാഴ്ത്തുന്നു.പഴമയുടെ ഗന്ധവും, സൗന്ദര്യവും ഒപ്പിയെടുത്തു കൊണ്ടുള്ള  അന്തരീക്ഷത്തിൽ  മുന്നേറുകയാണ്  മാതേച്ചിയെന്ന  ഒറ്റക്കാലുള്ള പാവം പ്രേതവും,പ്രൊഫസർ മാർഗരറ്റും,മറ്റേമ്മയും, പിന്നെ കഥാകാരനും.
ഭാവനകളുടെ കെട്ടഴിഞ്ഞു വീഴുന്ന ഓരോ പേജുകളും  മറിച്ചു പോവുമ്പോൾ ഞാനൊരു പൊട്ടകിണറ്റിൽ വീണിരുന്നു . അവിടെ ഞാൻ കണ്ടു മാധവിയെ.അവരെന്റെ അടുത്തേക്ക് വന്നപ്പോൾ ഭയമെന്ന വികാരം മഞ്ഞുതുള്ളി പോലെ അന്തരീക്ഷത്തിൽ അലിഞ്ഞില്ലാതായി.പഴയൊരു തറവാടും,പുതുമയില്ലാത്ത ഇതിവൃത്തവും, ഏതാനും കഥാപാത്രങ്ങളും മാത്രം വന്നു പോവുന്ന ഒറ്റക്കാലുള്ള പ്രേതമെന്ന ഗോഥിക്  നോവലെറ്റ് ജി.ആർ ഇന്ദുഗോപന്റെ ആഖ്യാനശൈലിയിൽ ചുറ്റിസഞ്ചരിക്കുമ്പോൾ ദൃശ്യപാടവം കൊണ്ടു വായനക്കാരനെ കയ്യിലെടുക്കുന്നു.തറവാടും,കാരണവരും,  അന്ധവിശ്വാസങ്ങളും, മന്ത്രവാദികളും  കടന്നു വരുന്ന നോവലെറ്റ്  ഒരു നൊസ്റ്റാൾജിയയയാണ്.കണ്ടും കേട്ടും ശീലിച്ച  പ്രതികാരദാഹിയായ,  അലഞ്ഞു തിരിയുന്ന പ്രേതങ്ങളിൽ നിന്നും വ്യത്യസ്തമായൊരു പ്രേതത്തെ കണ്ടു മുട്ടി,ആ പ്രേതം നമ്മളോട് വിട പറയുമ്പോൾ  അതൊരു നോവായി മനസ്സിൽ അവശേഷിക്കും.

ഒരു കൊലയുടെ ചുരുൾ :-
കൊച്ചിയിലെ ബോട്ടുജട്ടിക്കു  സമീപം കൊന്നു കത്തിച്ച ഒരു ജഡം കണ്ടെത്തിയെത്ര.പടം കണ്ടിട്ടും വേലാണ്ടിക്കൊരു കുലുക്കവുമില്ല.അയാൾ ചിന്തിക്കുന്നത് കൊന്നവന്റെ മാനസികാവസ്ഥയെക്കുറിച്ചാണ്.മനുഷ്യശരീരമെന്നത് തടിച്ചു ചീർത്ത ഒരു മാംസപിണ്ഡം മാത്രമാണ്.  ആ മാംസപിണ്ഡത്തിന്റെ അഹങ്കാരവും, നെഗളിപ്പുമെല്ലാം ചത്തു കഴിഞ്ഞാൽ പുഴുവിനും,പാമ്പിനും ആഹാരമായി മണ്ണിനടിയിൽ ലയിക്കും.
കൊച്ചിയും പരിസരവും പശ്ചാത്തലമാക്കി വേലാണ്ടിയെന്ന കഥാനായകന്റെ ജീവിതവും ചുറ്റുപാടുകളും ഇതൾവിരിയുന്ന  ഒരു ലഘുനോവലാണ് “ഒരു കൊലയുടെ ചുരുൾ.”ഓരോ വായനയും കഴിയുമ്പോൾ  വീണ്ടും വീണ്ടും ചിന്തിപ്പിക്കാനുതകും വിധം  ഒളിഞ്ഞു കിടക്കുന്ന ജി. ആർ ഇന്ദുഗോപന്റെ ക്രാഫ്റ്റുകൾ  വായിച്ചറിയുന്നതാവും ഉത്തമം.ഈ കുഞ്ഞു ബുക്കിനെക്കുറിച്ച് സൂചിപ്പിച്ച ഉടനെ കളക്ഷനിൽ നിന്നും ബുക്കെടുത്തു അയച്ച പുസ്തകപീടികക്കു( ഒരുപാട് നന്ദി.

ഒറ്റക്കാലുള്ള പ്രേതം

Author       :  ജി. ആർ ഇന്ദുഗോപൻ
Publisher   :  ചിന്താ പബ്ലിക്കേഷൻസ്
Price          :  70/-

© ജിയോ ജോർജ്

കുറ്റവും   കുറ്റാന്വേഷണവും

“ആളുകൾ ജീവനെ വിലമതിക്കട്ടെ അധികം അകലം സഞ്ചരിക്കുന്നത് അപകടമാണ്. വള്ളവും, വണ്ടികളും എത്രയുണ്ടെങ്കിലും അവയൊന്നും ഉപയോഗിക്കാതിരിക്കുന്നതാണുത്തമം. “

പ്രശസ്തമായ ഒരു ചൈനീസ് പഴമൊഴി  കടമെടുത്തു പറഞ്ഞു കൊണ്ട്   കുറ്റവും  കുറ്റാന്വേഷണവും   സീരിസിൽ ഒരു പ്രധാന കൊലപാതകകകേസ്  അവസാനിപ്പിക്കുമ്പോൾ അനുവാചകരിൽ   ഒരു  തരിപ്പുണ്ടാവും.രക്തം മരവിച്ചു പോവുന്ന ക്രൂരതകൾക്ക് പിന്നിലെ കാണാകാഴ്ചകളിലേക്ക്, അതിന്റെ ഉള്ളറ കളിലേക്കു വിശദമായി ഇറങ്ങിചെന്ന് ആ കേസുകൾ അന്വേഷിച്ച ഉദ്യോസ്ഥൻ തന്നെ  ഒരു കഥ പോലെ വിവരിക്കുമ്പോൾ സിനിമയെ വെല്ലുന്ന ആകാംഷയും  അതിലുപരി ഭീതിയും ഉണ്ടാകും.

“സ്പെഷ്യൽ ഇൻവെസ്റ്റിഗേഷൻ ഗ്രൂപ്പ് (SPECIAL INVESTIGATION TEAM/SPECIAL INVESTIGATION GROUP)”
കേരളത്തെ നടുക്കിയ ഒരുപിടി  കൊലപാതകങ്ങളും, കൊലപാതക പരമ്പരകളും  അന്വേഷിക്കുകയും,നിഗൂഢതകൾ മറ നീക്കി  കുറ്റവാളികളെ കണ്ടെത്തുകയും ചെയ്ത  ക്രൈം ബ്രാഞ്ചിന്റെ പ്രിത്യേക സ്‌ക്വഡുകൾ ആണ്  എസ്. ഐ. റ്റി  അഥവാ എസ്. ഐ. ജി. എന്നാൽ  ഈ അന്വേഷണങ്ങൾക്ക് നേത്വത്വം  നൽകിയത് ആരാണെന്നുള്ള കാര്യം പലർക്കും  ഇന്നും അജ്ഞാതമാണ്.അവർക്ക് മുന്നിലേക്കാണ് ജോർജ് ജോസഫ് മണ്ണൂശ്ശേരി എന്ന ഉദ്യോഗസ്ഥനെ പരിചയപ്പെടുത്തുന്നത്.സുകുമാരകുറുപ്പ് മുതൽ കുപ്രസിദ്ധമായ ഹംസ കൊലക്കേസ്  വരെ  തെളിയിക്കുന്നതിൽ നിർണായകമായ കണ്ടെത്തലുകൾ നടത്തിയ അദ്ദേഹത്തിന്റെ  കുറ്റാന്വേഷണ  പരമ്പരയാണ്  മൂന്നു  സീരീസുകൾ ആയി  പുറത്തിറങ്ങിയ 

1.”കുറ്റവും   കുറ്റാന്വേഷണവും- സുകുമാരക്കുറുപ്പ് മുതൽ.. “

2.”കുറ്റവും   കുറ്റാന്വേഷണവും-ആലുവ കൂട്ടക്കൊല മുതൽ.. “

3.”കുറ്റവും   കുറ്റാന്വേഷണവും-ഹംസ കൊലക്കേസ് മുതൽ..”

വെറുമൊരു കഥ മാത്രമായി ഒതുക്കി നിർത്താതെ മൂന്നു ബുക്കുകളിലായി   പത്തോളം കേസുകളുടെ ഉള്ളറയിലേക്കും, കുറ്റവാളികളുടെ  മനസ്സിലൂടെയും,അന്വേഷണത്തിൽ അഭിമുഖികരിക്കേണ്ട വന്ന  മനപ്രയാസങ്ങളും വെല്ലുവിളികളും എടുത്തു പറഞ്ഞു  കൊണ്ടാണ് ശ്രീ ജോർജ്  ജോസഫ് മണ്ണൂശ്ശേരി ഈ  സീരിസിലൂടെ വായനക്കാരോട് സംവദിക്കുന്നത്. മേലധികാരികൾക്കിടയിൽ  നിലനിന്ന  ഇരട്ടത്താപ്പ് നയങ്ങളും, കട്ടവനെ   കണ്ടില്ലെങ്കിൽ കണ്ടവരെ  പിടിക്കുന്ന പോലീസിന്റെ  പിടിപ്പുകേടുകളും  നിശ്ചിതമായി  വിമർശിച്ചു കൊണ്ട്  അദ്ദേഹം  ഈ സീരീസ്   അവസാനിപ്പിക്കുന്നത്. കുറ്റാന്വേഷണം   ഇഷ്ടപ്പെടുന്നവർക്കും,കൊലക്കേസുകളെക്കുറിച്ചു  അറിയാതെ  പോയ  വിവരങ്ങൾ കൂടതൽ   അറിയാൻ  ആഗ്രഹിക്കുന്നവർക്കും തീർച്ചയായും  വായിക്കാവുന്ന  സീരീസ്.

കുറ്റവും  കുറ്റാന്വേഷണവും (സീരീസ്)

AUTHOR        : ജോർജ്  ജോസഫ് മണ്ണൂശ്ശേരി
PUBLISHERS :  പൂർണ്ണ പബ്ലിക്കേഷൻസ് GENRE : കുറ്റാന്വേഷണം
PRIZE             :  290 (3 books)

©Geo George

ട്വിങ്കിൾ റോസയും പന്ത്രണ്ടു കാമുകന്മാരും

“അന്നേരം വെള്ളത്തിലൊരു ഓളപ്പെരുപ്പം കണ്ടു. കണ്ടലീന്നു കുറേ കിളി പറന്നു. ഒരു പ്രേതവള്ളം ആളില്ലാതെ അനങ്ങി വന്നു വെള്ളത്തിൽ ഒരു ഉടലും തലയും പൊന്തി വന്നു -ട്വിങ്കിൾ റോസയും  പന്ത്രണ്ടു കാമുകന്മാരും”

ഒരു സിനിമയുടെ ദൃശ്യാവിഷ്‌കരണം പോലെ അമ്പരപ്പിക്കുന്ന അവതരണ ശൈലി.മാജിക്കൽ റിയലിസത്തിന്റെയും, ഭാവനയുടെയും മൂർത്തരൂപം ഒരു ക്യാമറകണ്ണിലൂടെയെന്ന പോലെ വായനക്കാരന്റെ മനസ്സിൽ പതിയുന്ന വിധമാണ് ജി. ആർ ഇന്ദുഗോപൻ ട്വിങ്കിൾ റോസയും പന്ത്രണ്ടു കാമുകന്മാരും എന്ന രചന അവതരിപ്പിച്ചിക്കുന്നത്.പുണ്യാളൻ ദ്വീപൊരു  ചെറിയ തുരുത്താണ്.കക്ക വാരിയും, മീൻ പിടിച്ചും ജീവിക്കുന്ന  പച്ച മനുഷ്യരെ നമുക്കവിടെ ദർശിക്കാനാവും.അവിടെ  ടെറി പീറ്ററുണ്ട്, ഹാരോച്ചനും, ക്ലിന്റണും നെറ്റോയുമുണ്ട്,പ്രേത വള്ളമുണ്ട്, അർണോൾഡ് വാവയും, ഡോൾഫിൻ കാമുകനുമുണ്ട്. അവിടേക്കാണ് ടെറി പീറ്ററിന്റെ കെട്ട്യോളായി  ട്വിങ്കിൾ റോസ പുന്നൂസിന്റെ വരവ്.പിന്നീടുണ്ടാവുന്നതെല്ലാം സ്വപ്നമല്ല യാഥാർഥ്യമാണ്. മാജിക്കൽ റിയാലിസത്തിന്റെയും,ഭാവനയുടെയും മൂർത്ത രൂപമായി ആ ചെറിയ തുരുത്തും ഓരോ  കഥാപാത്രങ്ങളും ചേർന്ന്  നിലാവിന്റെ ഭംഗിയെ അടയാളപ്പെടുത്തി  ഒരു  യാത്രയുണ്ട്.ഗംഭീരം എന്നല്ലാതെ എന്ത് പറയാൻ.അസാധ്യം എന്ന്  പറയാവുന്ന രചന.

“പുഷ്പവല്ലിയും യക്ഷി  വസന്തവും”
ഇന്ദുഗോപന്റെ കുറ്റാന്വേഷണ കഥാപാത്രമായ ഡിറ്റക്റ്റീവ് പ്രഭാകരൻ കേന്ദ്ര കഥാപാത്രമായെത്തുന്ന  കഥയാണിത്. മനുഷ്യന്റെ ചോരയൂറ്റികുടിക്കുന്ന കുളയട്ടയെപ്പോലെ ഏതു രഹസ്യവും ചോർത്തിയെടുക്കുന്ന പ്രഭാകരനെത്തേടി കള്ളുറാണി പുഷ്പവല്ലിയുടെ ഉടമസ്ഥതയിലുള്ള  കാർത്ത്യാനി ബാറിന് സമീപം നടക്കുന്ന ഒരു  കൊലപാതകക്കേസ് പോലീസ് ഏല്പിക്കുന്നു.അന്യോഷണങ്ങളോടും, നിഗൂഢതകളോടും ഭ്രാന്തമായ ആവേശമുള്ള പ്രഭാകരൻ രഹസ്യങ്ങളുടെ ചുരുളഴിക്കുമോ..?

“ആരൾവായ്മൊഴിയിലെ പാതി  വെന്ത മനുഷ്യൻ”
കന്യകുമാരി ജില്ലയിലെ പഴയ തിരുവിതാംകൂറിലേക്കുള്ള  യാത്രകളിൽ ഉണ്ടായ  അനുഭവങ്ങളിലൂടെ, ആരൾവായ്മൊഴിയെന്ന  അതിർത്തി ഗ്രാമവും റയിൽവേ സ്റ്റേഷനും ഇതിവൃത്തമാക്കി  രചിയിതാവിന്റെ  ഭാവനയിൽ  വിരിഞ്ഞ  ഒരു  ചെറുനോവലാണിത്.

ഒരു ബുക്ക്‌, മൂന്നു ചെറു നോവലുകൾ  മൂന്നും വ്യത്യസ്ത  പ്രമേയങ്ങൾ.അതാണ്  ട്വിങ്കിൾ റോസയും  പന്ത്രണ്ടു കാമുകന്മാരും എന്ന ബുക്കിന്റെ  ഉള്ളടക്കം. വളരെ വേഗം കഥയിലേക്ക് കടക്കുന്ന  അവതരണശൈലിയും ആഖ്യാനവും ഇന്ദുഗോപൻ രചനകളുടെ മുഖമുദ്രയായതിനാൽ ഇരുന്ന ഇരുപ്പിൽ  രചയിതാവിന്റെ    രചനാപാടവത്തിൽ വായനക്കാരൻ  മയങ്ങി വീണിട്ടുണ്ടാവും.കൃത്യമായ നിരീക്ഷണപാടവവും,ദൃശ്യവൽക്കരണ ശേഷിയും  കൊണ്ട്   അനുവാചകരിൽ അതിവേഗം ഒരു വൗ ഫാക്ടർ സമ്മാനിക്കുന്ന ഒരു കുഞ്ഞു പുസ്‌തകം.

ട്വിങ്കിൾ റോസയും പന്ത്രണ്ടു കാമുകന്മാരും
Author      : ജി. ആർ  ഇന്ദുഗോപൻ
Publisher :  ഡിസി ബുക്സ്
Prize         :  130

©Geo George

ഫൈനൽസ്

“Based on  a  True  Story “

പൂർണ്ണമായും  അങ്ങനെ  പറയാനാവില്ലെങ്കിലും  മത്സര നടത്തിപ്പിലെ  അപാകതകൾ കാരണം   അകാലത്തിൽ പൊലിഞ്ഞ ഷൈനി  സൈലസ് എന്ന  സൈക്ലിങ്   താരത്തിന്  നൽകുന്ന ആദരവാണ്  പി. ആർ  അരുൺ  കഥയും  തിരക്കഥയും  സംവിധാനവും  നിർവഹിച്ച  ഫൈനൽസ്.

ടോക്കിയോ ഒളിമ്പികിസിൽ സൈക്ലിങ്ങിൽ
ഇന്ത്യയെ പ്രതിനിധീകരിക്കാൻ  ഒരുങ്ങുകയാണ്   ഇടുക്കിയിലെ  മലയോരഗ്രാമത്തിലെ  കായിക പരിശീലകനായ  വർഗീസിന്റെ  മകൾ ആലീസ്. അവരുടെ അയൽവാസിയും  ആലീസിന്റെ  കളിക്കൂട്ടുകാരനുമാണ്  മാനുവൽ. ഇവരെ  കേന്ദ്രീകരിച്ചാണ്  കഥ മുന്നേറുന്നത്. ആലീസായി  രജിഷാ വിജയനും, വർഗീസായി സുരാജ് വെഞ്ഞാറമ്മൂടും, മാനുവലായി  നിരഞ്ജൻ മണിയൻപിള്ള രാജുവും  എത്തുന്ന  സിനിമ  സ്പോർട്സ്  ഡ്രാമ വിഭാഗത്തിൽ  ഉൾപ്പെടുന്നതാണ്.

സ്പോർട്സ്  ഫെഡറേഷനിൽ  ഇപ്പോഴും തുടർന്ന് പോരുന്ന  വിവേചനവും, കൊടിയ അഴിമതിയും, ലൈംഗിക പീഡനവും,ഇരട്ടത്താപ്പ്  നയങ്ങളും, പാരവെപ്പും വ്യക്തമായി തുറന്നടിക്കുന്ന  മലയാള സിനിമയാണ്  ഫൈനൽസ്. പ്രതിഭയുടെ  തിളക്കമുണ്ടെങ്കിലും സാധാരണക്കാരായ സ്പോർട്സ് താരങ്ങളും, പരിശീലകരും അനുഭവിക്കേണ്ടി വരുന്ന  അവഗണനകളും, പരിഹാസങ്ങളും, മാനസിക, ശാരീരിക  പീഡനങ്ങളും വിഷയ ഗൗരവം  ചോരാതെ  പ്രേക്ഷകരിലേക്ക് എത്തിക്കുന്ന ആഖ്യാന രീതിയാണ്  അണിയറ പ്രവർത്തകർ  സ്വീകരിച്ചത്.
ആലീസിനെ കേന്ദ്രീകരിച്ചു  മുന്നേറുന്ന  കഥ  വർഗീസിലൂടെയും, മാനുവലിലൂടെയും  പറഞ്ഞു കൊണ്ട് അവസാനിക്കുമ്പോൾ  പ്രേഷകരുടെ മനസ്സ് നിറയും.പെർഫോമൻസ് കൊണ്ടും  സ്ക്രിപ്റ്റ്  സെലെക്ഷൻ  കൊണ്ടും വിസ്മയിപ്പിക്കുന്ന  സുരാജിന്റെ  വർഗീസായിട്ടുള്ള  പ്രകടനം  ഗംഭീരമായിരുന്നു. തിരഞ്ഞെടുക്കുന്ന കഥാപാത്രത്തോട്  അർപ്പണ മനോഭാവമുള്ള  രജീഷ വിജയൻ
ഈ  സിനിമയിലും  പതിവ്  തെറ്റിച്ചില്ല. ആലീസായി  സ്വയം  സമർപ്പിച്ചു.ഇമോഷണൽ രംഗംങ്ങളിലും, അവർ പുലർത്തിയ മികവ്  എടുത്തു പറയേണ്ടതാണ്.മാനുവലായി വേഷമിട്ട  നിരഞ്ജൻ മണിയൻപിള്ളരാജുവിന്റെ  പ്രകടനം  ഒരു സർപ്രൈസ് തന്നെ   ആയിട്ടുണ്ട്. കഥയാവശ്യപ്പെടുന്ന  വൈകാരിക മുഹൂർത്തങ്ങൾ മാത്രം  സൃഷ്ടിച്ചു നുറുങ്ങു ട്വിസ്റ്റുമായി പറഞ്ഞു പോവുന്ന  ഫൈനൽസ്  സ്പോർട്സ്  ഡ്രാമ  എന്ന  വിഭാഗത്തിൽ ശ്രദ്ധ കേന്ദ്രീകരിച്ചു  മലയാളത്തിൽ സമീപകാലത്തു  വന്ന   നല്ല  സിനിമയാണ്.

ഇടുക്കിയുടെ ദൃശ്യ ഭംഗിയിലേക്ക്  മിഴി തുറക്കുന്ന  ക്യാമറക്കണ്ണുകളുമായി സുദീപ് ഇളമണ്ണിന്റെ  ഷോട്ടുകൾ  ക്വാളിറ്റി  ഉള്ളവയും സ്പോർട്സ്  സിനിമക്ക്  അനുയോജ്യമായതും  ആയിരുന്നു. കഥയോട്  ചേർന്ന് നിൽക്കുന്ന   ഗാനങ്ങളും,  നിർണ്ണായകമുഹൂർത്തങ്ങളിൽ  പ്രേക്ഷകനെ  ഫീൽ ചെയ്യിക്കുന്ന ബാക്ക്ഗ്രൗണ്ട് മ്യൂസിക്കും  സമ്മാനിച്ച   കൈലാസ് മേനോനും,എഡിറ്റിംഗ്  ഗംഭീരമാക്കിയ  ജിത്ത് ജോഷിയും ഇവരുടെയൊക്കെ  നേടുംതൂണായ സംവിധായകൻ പി. ആർ  അരുണിനും,   അണിയറയിൽ  പ്രവർത്തിച്ചവർക്കും  ഈ  ചിത്രം സമ്മാനിച്ച  മണിയൻപിള്ളരാജു പ്രൊഡക്ഷനും  ഒരുപാട്  നന്ദി നല്ലൊരു  ചിത്രം  സമ്മാനിച്ചതിന്.

© ജിയോ ജോർജ്

ഇന്ദ്രനീലിമയോലും ഈ മിഴിപ്പൊയ്കകൾ ഒരോർമ്മക്കുറിപ്പ്

ഇന്ന്  യൂട്യൂബിൽ  പഴയ സിനിമാ   ഗാനങ്ങൾ  കേട്ടിരിക്കുമ്പോൾ   അമ്മയുടെ തറവാടും,  മുത്തശ്ശന്റെ  ഫിലിപ്സ്  റേഡിയോയുമാണ്  എന്റെ  ഓർമ്മകളിൽ   നിറഞ്ഞു നിൽക്കുന്നത്.1999 കാലഘട്ടമായതിനാൽ  ഇന്നത്തെപ്പോലെ വിരൽത്തുമ്പിൽ പാട്ടോ, സിനിമയോ  ലഭ്യമായിരുന്നില്ല എന്നോർമ്മിപ്പിക്കുന്നു.

തറവാട്ടിൽ  ടെലിവിഷൻ  ഇല്ലായിരുന്നത്  കൊണ്ട്  അന്ന്  പാട്ടു കേൾക്കുവാൻ  മുത്തശ്ശന്റെ  റേഡിയോ തന്നെയായിരുന്നു ആകെയുള്ള  ശരണം.അവധിക്കാലമായത്  കൊണ്ട്  രാവിലെ  മുതൽ  റേഡിയോയിൽ  നിന്നും  ഒഴുകിയെത്തുന്ന ഗാനങ്ങൾ കേട്ടിരിക്കുന്നത്  രസകരമായ  കാര്യമാണ്. ആ  ഇരുപ്പിലാണ്  ഞാനൊരു  പ്രണയ    ഗാനം  പതിവായി  ശ്രദ്ധിക്കാൻ   തുടങ്ങിയത്.

ഒ.എൻ.വി കുറുപ്പിന്റെ  വരികൾക്ക് ബോംബെ രവിയെന്ന സംഗീത സംവിധായകൻ ഈണമിട്ടു  മലയാളികളുടെ  പ്രിയങ്കരിയായ  ചിത്ര ചേച്ചി  ആലപിച്ച
“ഇന്ദ്രനീലിമയോലും ഈ  മിഴിപ്പൊയ്കകളിൽ
ഇന്നലെ  നിൻ മുഖം നോക്കി നിന്നു… “
എന്ന  ഗാനമായിരുന്നു  അത്.പാട്ടിന്റെ അർഥം നന്നായി  മനസിലാക്കാനോ  വരികൾ  വ്യക്തമായി  ഉരുവിടാനോ അറിയില്ലാത്ത  പ്രായമായിരുന്നു അത്.ചുരുക്കി പറഞ്ഞാൽ ഒന്നാം ക്ലാസ്സിൽ പഠിക്കുന്ന വിദ്യാർത്ഥി. 

അവധിക്കാലം ആയതിനാൽ  പിന്നീടുള്ള ദിവസങ്ങളിൽ  ആ  ഗാനം  സംപ്രേഷണം ചെയ്യുന്ന  സമയം ക്ലോക്കിൽ  നോക്കി  ഉറപ്പു വരുത്തി  തുടർച്ചയായി കേൾക്കുന്നത്  ഒരു  ഹോബി ആയിരുന്നു.ആദ്യത്തെ  ഏതാനും  ചില  വരികൾ  അതിനിടയിൽ  മനഃപാഠമാക്കിയിരുന്നു. അതു പാടി നടന്നപ്പോൾ  മുതിർന്നവർ ചിരിക്കുന്നത്  കണ്ടപ്പോൾ എനിക്കും  ആവേശമായി. അവധിക്കാലം  കഴിഞ്ഞു  സ്കൂൾ  തുറന്ന ശേഷവും  ഞാനത്  ഇടക്ക്  പാടി  നടന്നു കൊണ്ടിരുന്നു. അന്നൊക്കെ  സ്കൂളുകളിൽ  വെള്ളിയാഴ്ചകളിൽ  അവസാനത്തെ  പീരിയഡ്  കുട്ടികൾക്ക്  ക്ലാസ്സിൽ  കലാപരിപാടികൾ അവതരിപ്പിക്കാനുള്ളത്  ആണ്.അന്നാദ്യമായി  എവിടുന്നോ  കിട്ടിയ  ധൈര്യത്തിൽ  ടീച്ചറിന്റെ  മുന്നിൽ  നിന്നു ഇന്ദ്രനീലിമയോലും പാട്ടിന്റെ  ആദ്യത്തെ ഏതാനും  വരികൾ  പാടിത്തുടങ്ങിയതേ  ഓർമ്മയുള്ളു ടീച്ചർ വാ  പൊത്തി ചിരിച്ചു കൊണ്ടു  സീറ്റിൽ  പോയിരിക്കാൻ പറഞ്ഞതായി  ഞാനോർക്കുന്നു.അന്നുമെനിക്ക്  വ്യക്തമായൊരു ധാരണ  ആ  ഗാനത്തെക്കുറിച്ച്  ഉണ്ടായിരുന്നില്ല.പിന്നീടെപ്പോഴോ പഠനത്തിനിടയിൽ അതിനെക്കുറിച്ചുള്ള   ചിന്തകൾ  മറന്നു.

ആറാം ക്ലാസ്സിൽ  പഠിക്കുന്ന  സമയത്ത് വീണ്ടുമൊരു അവധിക്കാലത്താണ്  വീണ്ടും  ആ  ഗാനം  എന്റെ ഓർമ്മകളിൽ  പൊടി തട്ടിയുണരുന്നത്. അന്ന്  തറവാടിന് അടുത്തുള്ള  വീട്ടിൽ  ടീവി  വന്നിട്ടുണ്ട്.വിരസമായ ഇടവേളകൾ  ഒഴിവാക്കാൻ  അവിടെപ്പോയിരുന്നു  ടീവി കാണുന്നത്  പതിവായിരുന്നു.കിരൺ ടീവിയിൽ  ആണെന്ന്  തോന്നുന്നു തനിയെ  ഇരുന്നു  ചാനൽ  മാറ്റിപ്പോകുമ്പോൾ ഓർക്കാപ്പുറത്താണ് ആ ഗാനം  കണ്ണിൽപ്പെടുന്നത്. മുനികുമാരനെപ്പോലെയൊരു യുവാവും  ദേവതയെപ്പോലൊരു  പെൺകുട്ടിയും  സ്‌ക്രീനിൽ  പ്രണയതുരമായ  നോട്ടത്തോടെ  ഇറുകെ  പുണരുന്നു. ബാക്ക്ഗ്രൗണ്ടിൽ  മുഴങ്ങുന്നത്  എന്റെ  ഇഷ്ടഗാനവും.മുഴുവൻ  കാണാൻ  കഴിഞ്ഞില്ല  ചെവിയിലാരോ  നല്ലൊരു  കീച്ചു തന്നപ്പോഴാണ്  ബോധം  വീണത്.അതിനു പുറകെ  “ആശ്ലീലം  കാണുന്നോടോ…?”  എന്നൊരു  ചോദ്യവും  ചോദിച്ചു  എന്നെയവിടുന്നു ആന്റി  ഓടിച്ചതും  ഇന്നുമൊരു സ്വപ്നം പോലെയാണ്.ആ സംഭവത്തിനു ശേഷം   കുറെ നാളത്തേക്ക്  എനിക്ക് ടീവിയുടെ  റിമോട്ട് കിട്ടിയിട്ടില്ല  എന്നതും  പച്ചയായൊരു  സത്യമാണ്.അതിനിടെ  ആ  സിനിമയുടെ  പേര്  വൈശാലി  എന്നാണെന്നും അത്   കുട്ടികൾ  കണ്ടു കൂടാ എന്നുമുള്ള  സംസാരങ്ങൾ  അമ്മയുടെയും,ആന്റിയുടെയും  സംഭാക്ഷണത്തിൽ  നിന്നും കേട്ടറിയുകയുണ്ടായി. അശ്ലീലം കാണുന്നുവെന്ന്  പറഞ്ഞു  അന്ന്  കിട്ടിയ  ഉപദേശവും,ചെവിക്കുള്ള  കീച്ചലും   ഗാനത്തെക്കുറിച്ചൊരു  ഏകദേശ ധാരണ  എനിക്ക്  സമ്മാനിച്ചു. ആ സംഭവത്തിനു  ശേഷം ഇന്ദ്രനീലിമയോലും  വരികൾ  പബ്ലിക്കായി  പാടിയിട്ടില്ലെങ്കിലും  ബാത്ത്റൂമിലും,വീടിന്റെ  ഒഴിഞ്ഞ കോണുകളിലും  വർഷങ്ങളായി   ഒരു മൂളിപ്പാട്ടായി എന്റെ  ചുണ്ടിൽ  ഉണ്ട്.

വർഷങ്ങൾക്കപ്പുറം  യൂട്യൂബിൽ മികച്ച  ക്വാളിറ്റിയിൽ  ഇന്ദ്രനീലിമയോലും  കണ്ടാസ്വദിക്കുമ്പോൾ    ആ ഗാനത്തിന്റെ  മനോഹാരിതയിലേക്ക്  ഇറങ്ങി നടക്കാൻ  കഴിയുന്നുണ്ട്.ഇടുക്കി ഡാമിന്റെ മനോഹരീതയിൽ,കുറവൻ-കുറവത്തി  മലനിരകൾക്ക് സമീപമുള്ള  ഗുഹയിൽ  വൈശാലിയും,ഋഷ്യശൃംഗനും ഒന്നിച്ചു  ആടിപ്പാടിയ  ഈ  പ്രണയഗാനം അന്നാദ്യമായി  റേഡിയോയിൽ  കേട്ടപ്പോഴും  ഇന്ന്  യൂട്യൂബിൽ  കേൾക്കുമ്പോഴും  ഹൃദയത്തിൽ  ഉണർത്തിയ   അനുരാഗ തരഗം  വാക്കുകളാൽ  വിവരിക്കാൻ കഴിയില്ല.മലയാളത്തിലെ മികച്ച  പ്രതിഭകളായ  ഒ. എൻ. വി യും,ഭരതനും,സ്വര മാധുര്യത്താൽ  വിസ്മയിപ്പിക്കുന്ന  ചിത്രചേച്ചിയും,ബോംബെ രവി  എന്ന  അതുല്യ  പ്രതിഭയും  സമ്മാനിച്ച  ഈ ഗാനം  ഇന്നും  കേൾക്കുന്നതൊരു  ലഹരിയാണ്.1989 ലെ  മികച്ച ഗാനരചിയിതാവിനുള്ള  ദേശീയ ചലച്ചിത്രപുരസ്‍കാരം  ഒ. എൻ. വിക്ക്  സമ്മാനിച്ചതായി  പിന്നീട്  വായിച്ചറിഞ്ഞിരുന്നു. 

മുത്തശ്ശൻ   ഓർമ്മയായെങ്കിലും  തറവാട്ടിൽ  ഇരിക്കുന്ന  നിറം  മങ്ങിയ  ഫിലിപ്സ്  റേഡിയോ കാണുമ്പോൾ ഇന്നുമെന്റെ   കാതുകളിൽ  മുഴങ്ങും.  “ഇന്ദ്രനീലിമയോലും ഈ  മിഴിപ്പൊയ്കകളിൽ
ഇന്നലെ  നിൻ മുഖം നോക്കി നിന്നു… “

©ജിയോ ജോർജ്